A wani mataki na kawo sauyi wajen samun damar kula da lafiya, Gwamnatin Jihar Katsina ta kaddamar da wani tsarin kula da lafiya Kyauta wanda aka ware musamman domin ‘yan fansho. A wata tattaunawa ta musamman da jaridar Katsina Times, Dr. Muhammad Tukur Safana, Darakta-Janar na Hukumar Gudanar da Tsarin Kula da Lafiya na Jihar Katsina (KTSCHMA), ya bayyana burin wannan shiri, muhimmancinsa, da yadda za a aiwatar da shi.  

Dr. Safana ya fara ne da nuna godiya ga ‘yan fanshon da suka halarci taron rijista da aka gudanar a Hedikwatar Karamar Hukumar Katsina. Ya bayyana cewa, “Wannan shiri ya samo asali ne daga umarnin Mai Girma Gwamnan Jihar Katsina, Malam Dikko Umar Radda, wanda ya bukaci a tabbatar cewa an yi wa dukan ‘yan fanshon jiha da na kananan hukumomi rijista a tsarin kula da lafiya. Wannan mataki na tabbatar da 'Yan Fansho sun samu raguwar kudaden da suke kashewa wajen kulawa da lafiyarsu, kuma za a tabbatar da Ingantacciyar kulawa don gudanar da tsarin yadda ya kamata ba tare da tangarda ba.

Ya jaddada cewa wannan shiri abu ne mai tarihi a tarihin jihar. “Samar da tsarin kula da lafiya ga ‘yan fansho har karshen rayuwarsu babban abin a yaba ne,” in ji shi. “Jihar Katsina ta kafa tarihi a kasa baki ɗaya ta hanyar kasancewa jiha ta farko da ta kaddamar da irin wannan shiri ga dukan ‘yan fansho nata.”  

Tsarin na bai wa ‘yan fansho damar samun kula da lafiya a matakin farko da na biyu a cibiyoyin da suka zaba yayin rijista. Haka kuma, suna da damar samun agajin gaggawa duk lokacin da aka samu matsala. Dr. Safana ya bukaci ‘yan fansho su fahimci hakkokinsu kuma su yi amfani da damar da aka samar ta wannan shiri, yana mai jaddada mahimmancinsa ga jin daɗinsu.  

Ya ƙara da cewa, “Mafi yawan ‘yan fansho suna da shekaru 60 ko sama da haka, kuma su ne rukunin da suka fi bukatar kulawa. Wannan shiri zai ba su inshorar lafiya kyauta, wanda zai tabbatar da samun kula da lafiyarsu.”  

Dr. Safana ya kuma bayyana babban burin hukumar na samar da kula da lafiya ga dukkan mazauna Jihar Katsina. Ya bayyana cewa hukumar na da niyyar yi wa mutane rabin miliyan rijista a wannan tsarin kafin ƙarshen shekara. “Aikinmu shi ne tabbatar da cewa duk mazauna Jihar Katsina suna da sauƙin samun kula da lafiya a duk inda suke.”  

Dr. Safana ya yi kira ga wadanda suka samu shiga cikin shirin da su yi amfani da wannan dama sosai. “Wannan dama ce ta musamman ga ‘yan fansho don samun ingantaccen kula da lafiya. Idan sun samu wani ƙalubale a cibiyoyin da suka zaba, za su iya kai rahoto zuwa hukumar, kuma za mu ɗauki matakin da ya dace don magance matsalar.”  

A ƙarshe, ya nuna godiyarsa ga gwamnatin jihar, musamman Gwamna Radda, bisa jagorantar wannan shiri duk da ƙalubalen tattalin arziki. “Wannan matakin ya nuna irin jajircewar gwamnati wajen kula da walwalar ‘yan fansho da kuma ƙoƙarin inganta tsarin kiwon lafiya a Jihar Katsina.”  

Tsarin Kula da Lafiya na Jihar Katsina ga ‘Yan Fansho na da alamar zama abin koyi ga sauran jihohi a Najeriya, yana nuna tasirin manufofi masu ma’ana da kuma haɗa kan al’umma wajen samun ingantacciyar lafiya.