A wani sauyin majalisar zartarwa da Shugaban Kasa Bola Tinubu ya yi, an cire ministoci biyar sannan aka nada sababbin ministoci bakwai, wadanda ke jiran tantancewa daga Majalisar Dattijai. Wannan mataki, wanda ke daga cikin shirin Tinubu na sake fasalin gwamnati, ya janyo martani daga bangarori daban-daban a Najeriya, musamman kan mukaman ministoci biyu: ci gaba da rike mukamin Bello Matawalle a matsayin Ministan Tsaro da kuma Tinubu a matsayin Ministan Albarkatun Man Fetur.

Fasalin ya hada da rushe Ma’aikatar Ci gaban Wasanni, inda aka mayar da ayyukanta karkashin Hukumar Wasanni ta Kasa. Haka kuma, an canza sunan Ma’aikatar Ci gaban Yankin Neja-Delta zuwa Ma’aikatar Ci gaban Yankuna, wacce za ta kula da ayyukan ci gaban yankuna daban-daban a fadin Najeriya, da suka hada da Neja-Delta, Kudu Maso Gabas, Arewa Maso Gabas da Arewa Maso Yamma.

 Korafe-Korafe Kan Manufofin Siyasa

Daga cikin fitattun mutanen da suka yi tsokaci kan sauyin ministocin akwai Laolu Akande, tsohon mai magana da yawun tsohon Mataimakin Shugaban Kasa Yemi Osinbajo, da Austin Aigbe, Shugaban Kungiyar WADEMOS a yankin ECOWAS. Dukkansu sun bayyana damuwa cewa akwai yiwuwar wasu manufofin siyasa sun sa Tinubu ya dauki irin wannan mataki.

 Cece-Kuce Kan Ci Gaba da Rike muƙamin Matawalle

A wani shirin da aka gabatar a Channels Television mai suna "Sunrise Daily," Akande ya nuna rashin amincewa da ci gaba da rike mukamin Bello Matawalle a matsayin Ministan Tsaro. Matawalle, wanda tsohon gwamnan Jihar Zamfara ne, ya sha zargin cewa yana da hannu wajen goyon bayan ‘yan bindiga, zarge-zargen da gwamnan yanzu, Dauda Lawal, ya yi masa.

Lawal ya zargi Matawalle da bayar da goyon bayan kudi ga ‘yan bindiga a lokacin mulkinsa kuma ya nemi ya yi murabus domin fuskantar tuhumar da ake masa da suka hada da zargin hada kai da masu yin sata da kuma safarar kudade. Kalaman Lawal sun samu goyon baya daga wasu kungiyoyi na jam’iyyar APC, ciki har da Tinubu Youth Network (TYN), wacce ta roki Tinubu ya yi amfani da wannan dama na sauyin ministoci wajen cire Matawalle daga mukaminsa.

A watan Satumba, wasu masu zanga-zanga karkashin kungiyar APC Akida Forum sun yi tattaki zuwa hedikwatar Hukumar Yaki da Cin Hanci da Rashawa (EFCC) a Abuja, suna neman a gudanar da bincike kan zarge-zargen da ake yi wa Matawalle. EFCC ta mayar da martani ta hanyar alkawarin duba zarge-zargen da ake masa. Matawalle ya karyata dukkan zarge-zargen, inda ya kalubalanci Lawal da ya kawo shaidu.

Akande ya ce tsananin zarge-zargen da gwamnan ke yi wa Matawalle ya kamata ya janyo a gudanar da bincike mai zurfi, yana mai cewa, “Idan gwamna mai ci yana zargin minista da goyon bayan ‘yan bindiga, al’umma na bukatar a yi bincike domin gano gaskiya.”

Tirka-Tirka Kan Rike Mukamin Ministan Man Fetur da Tinubu Ya Yi

Austin Aigbe, yayin da yake magana a Arise News, ya bayyana damuwa kan rike mukamin Ministan Albarkatun Man Fetur da Tinubu ya yi tare da kasancewarsa Shugaban Kasa. Aigbe ya yi kira ga Tinubu da ya mika mukamin ga wanda zai gudanar da harkokin ma’aikatar yadda ya kamata domin magance matsalolin da ke damun bangaren albarkatun man fetur a Najeriya.

“Shugaban kasa ya kamata ya yi la’akari da nada wani Minista mai kula da Ma’aikatar Man Fetur,” inji Aigbe. “Bangaren yana da muhimmanci, kuma shugaban kasa, wanda yake da nauyin jagorancin kasa, ba zai iya gudanar da wannan ma’aikatar ba tare da daukar wahala ba.”

Aigbe ya kuma yaba da rushe Ma’aikatar Ci Gaban Yankin Neja-Delta, yana mai cewa kirkirar Ma’aikatar Ci Gaban Yankuna na daga cikin matakan rage kashe kudade da kuma inganta gudanar da ayyuka a cikin gida.

 Tattaunawa a Bainar Jama’a Kan Garambawul a Gwamnati

Sauyin ministocin da Shugaba Tinubu ya yi ya janyo muhawara a tsakanin jama’a, inda ake tambaya kan dalilan wasu nadin ministoci da kuma tasirin rike mukamai biyu. Yayinda ake jiran tantancewa daga Majalisar Dattijai, hankula sun karkata ga ganin ko sauyin da Tinubu ya yi zai dace da alkawarin gwamnatinsa na tabbatar da gaskiya da kuma inganta shugabanci.