Cibiyar Yaki Da Tauye Hakkin Dan Adam da Wayar da Kan Jama’a (IHRAAC) ta bayyana damuwarta sosai game da yadda ake kara tauye hakkin dan adam a arewa maso yammacin Najeriya da kuma matsalolin tattalin arziki da jama’a ke fuskanta sakamakon manufofin gwamnati kan bangaren man fetur. A cikin wata sanarwa da Shugaban IHRAAC, Dakta Salisu Musa, ya sanya wa hannu, kungiyar ta yi kira ga daukar mataki kan wannan lamari da ya shafi tsaron al’umma da kuma tasirin manufofin gwamnati a bangaren man fetur.

Tauye Hakkin Dan Adam a Arewa Maso Yamma

IHRAAC ta ce, kundin tsarin mulkin Najeriya ya tabbatar da hakkin kowa na rayuwa da martabar dan adam, kamar yadda aka tanadar a "Sashe na IV, Sashe na 33 da 34" na kundin tsarin mulki. Sai dai kungiyar ta bayyana cewa, cigaba da tashin-tashina, sace-sace, da cin zarafin jama’a a yankin arewa maso yamma na karya wadannan dokokin da na Kundin Kare Hakkin Dan Adam na Afrika. Sashe na 4 na wannan kundin ya tabbatar da hakkin kowa na rayuwa, yayin da Sashe na 5 ya haramta azabtarwa da cin zarafi, wanda IHRAAC ta ce ana yin watsi da wadannan tanade-tanade.

Dakta Salisu Musa, tare da manyan jami'an IHRAAC, ciki har da Kwamishinarta ta Kasa, Hajiya Bilkisu Musa Yakubu, da shugabannin ayyuka daga jihohin daban-daban, sun yi kira da a dauki matakin gaggawa kan wannan tauye hakkin.

Matsalolin Tattalin Arziki da Kuskuren Gudanar Da Bangaren Man Fetur

IHRAAC ta kuma soki yadda gwamnati ke gudanar da bangaren man fetur, wanda ta ce ya kara tabarbarewar tattalin arziki ga ‘yan Najeriya. Kungiyar ta ce, "Sashe na 16" na kundin tsarin mulkin Najeriya ya wajabta wa gwamnati ta tabbatar da jin dadin al’ummarta, amma manufofin gwamnati a yanzu suna kara talauci da rashin daidaito. IHRAAC ta alakanta wannan da cin zarafi kan yarjejeniyar kasa da kasa kamar Sashe na 22 na Kundin Kare Hakkin Dan Adam na Afrika da Sashe na 25 na Kundin Kare Hakkin Dan Adam na Duniya, wanda ke tabbatar da cigaban tattalin arziki da kuma damar samun abin da ya dace don ingancin rayuwa, wanda ya hada da abinci, wurin zama, da kula da lafiyar jama’a.

Illolin Rashin Cika Alkawari

Sanarwar ta gargadi cewa, gazawar gwamnati wajen magance wadannan matsaloli na iya haifar da mummunan tasiri a cikin gida da wajen kasar. A cikin gida, IHRAAC ta bayyana cewa cigaba da tauye hakkin dan adam yana lalata amanar jama’a, yana kawo rashin zaman lafiya a al’umma, da kuma kara tabarbarewa. A bangaren tattalin arziki, manufofin kan man fetur suna kara talauci. A kasa, IHRAAC ta nuna rashin nasarar Najeriya na samun kujera a Majalisar Kare Hakkin Dan Adam ta Majalisar Dinkin Duniya a matsayin alama ta yadda duniya ke kallon rikicin hakkin dan adam a kasar.

IHRAAC ta kara jan hankalin cewa Najeriya na iya fuskantar takunkumi daga kasashen duniya, rasa tallafin waje, da kuma rage karfin diplomasiyya idan ba a dauki matakin gyara ba.

A karshe, IHRAAC ta yi kira ga gwamnatin Najeriya da ta dauki matakin gaggawa don:

1. Dakile Tauye Hakkin Dan Adam: Tabbatar da kare hakkin al’umma a arewa maso yamma ta hanyar inganta tsaro da bin tsarin doka wanda zai kare martabar jama’a da hakkin su.

   

2. Rage Matsalar Tattalin Arziki: Sake duba manufofin farashin man fetur da aiwatar da gyare-gyaren tattalin arziki da za su fifita jin dadin al’umma, ta yadda jama’a za su iya samun abin bukata na yau da kullum.

   

3. Maido Da Darajar Najeriya: Gwamnati ta dauki matakin inganta matsayin Najeriya a duniya ta hanyar tabbatar da kare hakkin dan adam da kuma samar da gaskiya a ayyukan ta.

IHRAAC ta bayyana cewa, jama’ar Najeriya suna da hakkin samun shugabanci da zai kare hakkin su, ya tabbatar da jin dadin su, kuma ya yi aiki don amfanin al’umma. Gwamnati na da damar sake gina amana, martaba, da adalci.