Hijira, Yunwa da Sulhu Mara Tabbas na Ci Gaba da Sauya Rayuwar Mutane a Karkara
Daga Zaharaddeen Ishaq Abubakar
Katsina Times — 15, Agusta 2025
Duk da murna da wasu al'ummar Katsina ke yi kan yarjejeniyar zaman lafiya da aka kulla da ‘yan bindiga a wasu yankuna, bincike na musamman ya gano cewa har yanzu akwai kananan hukumomi da ke fuskantar hare-hare, hijirar jama’a, da tsananin yunwa.
Rahotannin Premium Times, Reuters da AllAfrica sun nuna cewa daga ƙarshen Yuli zuwa tsakiyar Agusta 2025, matsalolin tsaro sun ci gaba da addabar al’ummomin karkara duk da ƙarin jami’an tsaro da kuma sulhun da aka kulla.
Faskari, Kankara da Matazu na cikin jerin kananan hukumomin da ke fuskantar hare-hare akai-akai, abin da ke tilasta wa mazauna barin muhallansu. A ƙarshen watan Yuli, hare-haren da aka kai a Bakori da Faskari sun tilasta wa fiye da mutum 5,000 barin gidajensu a kauyukan Guga, Kandarawa da Gidan Sule. Shaidu sun bayyana yadda aka yi garkuwa da mutane, aka lalata amfanin gona da kuma sace shanu.
A Dutsinma, ‘yan bindiga sun yi garkuwa da mutane biyu kafin mazauna su cafke ɗaya daga cikin maharan su kashe shi. Duk da ƙara sintiri, kauyuka masu nisa har yanzu na cikin haɗari.
A ranar 11 ga Agusta, Safana ta rattaba hannu kan yarjejeniyar zaman lafiya da ‘yan bindiga a dajin Gemi, wadda ta bai wa manoma, makiyaya da mazauna garuruwa damar gudanar da ayyuka ba tare da tsangwama ba. Yarjejeniyar ta kuma ƙunshi gyaran makarantu, asibitoci da rijiyoyi. Sai dai shugabannin al’umma sun yi gargadin cewa idan ba a sa ido ba, sulhun zai iya rushewa.
Jibia, Batsari, Danmusa, Katsina, Batagarawa, Charanci, Bindawa, Ingawa, Kafur da Danja sun sami kwanciyar hankali. Amma Malumfashi, Kurfi, Dutsinma, Kankia, Musawa, Bakori, Matazu, Funtua, Sabuwa da Dandume suna cikin matsakaita a kwanciyar hankali, inda ake samun hare-hare lokaci-lokaci.
A cikin shekaru biyu da suka wuce, sama da mambobi 100 na Community Watch Corps, ‘yan sanda fiye da 30, da kuma sojoji da dama sun rasa rayukansu a fafatawar da ‘yan bindiga, in ji Kwamishinan Tsaron Cikin Gida na Katsina.
Matsalar tsaro ta ƙara tsananta yanayin jinƙai.
Kungiyar Likitoci Marasa Iyaka (MSF) ta ce akalla yara 652 sun mutu da yunwa a Katsina a rabin farko na 2025, karin kashi 208% idan aka kwatanta da 2024. Masana sun danganta hakan da raguwar noma da kuma toshe hanyoyin kasuwanci saboda rikice-rikicen tsaro.
An kasa kananan hukumomin kamar haka:
Mafi Hatsari: Faskari, Kankara, Matazu
Hijirar Jama’a: Bakori, Faskari, Dutsinma
Matsakaicin Barazana: Malumfashi, Kurfi, Dutsinma, Kankia, Musawa, Bakori, Funtua, Sabuwa da Dandume
Mafi Sauƙi: Danmusa, Katsina, Batagarawa, Charanci, Bindawa, Ingawa, Kafur, Danja
Sulhu: Safana, Batsari, Jibia
Masana suna ganin ƙara jami’an tsaro a karkara, samar da masu sa ido na waje don tabbatar da bin sulhu, haɗa tallafin abinci da matakan tsaro, faɗaɗa aikin Community Watch Corps tare da inshora ga mambobi, da kuma wallafa rahoton tsaro na wata-wata domin dawo da amincewar jama’a, zai taimaka don samun saukin lamarin
