Kungiyar Kare Hakkin Dan Adam da Cibiyar Kare Muradun Jama’a reshen Jihar Katsina ta jinjinawa Hukumar ’Yan Sandan Jihar Katsina bisa kwarewa da jajircewar da DPO na Mashi, CSP Ilyasu Muhammad Kurfi, ke nunawa wajen tabbatar da tsaro a yankin.
A cikin wata wasika da kungiyar ta aike wa Kwamishinan ’Yan Sandan Jihar Katsina, ta bayyana gamsuwarta da dabarun DPO na yaki da safarar miyagun kwayoyi da sauran laifuka a cikin al’ummar karamar hukumar Mashi.
Kungiyar ta kuma yabawa tsarin hadin gwiwa da DPO Ilyasu Muhammad Kurfi ya bullo da shi, wanda ta ce ya taimaka wajen rage aikata laifuka a yankin. Ta ce hadin gwiwar da ’yan sandan Mashi ke yi da jami’an Hisbah, kungiyoyin sa-kai, da sauran masu kishin al’umma na taka muhimmiyar rawa wajen tabbatar da tsaro.
Wasikar ta jaddada cewa irin jagorancin DPO Kurfi abin koyi ne, tare da bayyana cewa yana tafiya ne a kan irin turbar aiki da Kwamishinan ’Yan Sandan Jihar Katsina, CP Aliyu Abubakar Musa, ke kokarin kafawa—wanda ya kunshi ladabtarwa, kwazo, gaskiya, da rikon amana wajen hidimtawa al’umma.
Kungiyar ta bayyana gamsuwarta da ci gaban da ake samu a rundunar ’yan sanda a Katsina, tana mai cewa an samu kyakkyawan sauyi a Mashi fiye da kowane lokaci a baya.
Daga karshe, kungiyar ta bukaci Hukumar ’Yan Sandan Jihar Katsina da ta ci gaba da karfafa gwiwar jami’an da suka ke fitowa daban da jajircewa wajen hidimtawa al’umma.
Wasikar dai ta samu sa hannun shugaban na jihar Katsina A.I. Yamadi, kuma an aika kwafinta ga DPO na Mashi, CSP Ilyasu Muhammad Kurfi.
