Katsina Times

Breaking News

Ambaliyar Ruwa: Kimanin Kashi Ɗaya Cikin Huɗu na Birnin Derna A Ƙasar Libya Ya Shafe

Katsina City News
12 Sep, 2023
View 998

Zaharaddeen Ishaq Abubakar, Katsina Times 12/09/ 2023

Kimanin kashi daya bisa hudu na birnin Derna da ke gabashin kasar Libya ambaliyar ruwa ta shafe, bayan da wata madatsar ruwa ta fashe a dalilin Guguwa, kuma ya zuwa yanzu an gano gawarwakin mutane sama da 1,000, in ji wani minista a Gwamnatin da ke kula da gabashin kasar a ranar Talata.

Yace "Na dawo daga Derna. Naga Matuƙar tashin hankali. Gawarwaki a kwance a ko'ina - a cikin teku, a cikin kwaruruka, a karkashin gine-gine," Hichem Chkiouat, ministan sufurin jiragen sama kuma memba na kwamitin gaggawa, ya shaida wa Reuters ta wayar tarho.

“Yawan gawarwakin da aka gano a Derna sun fi 1,000,” in ji shi. Ya ce "Ina tsammanin adadin ƙarshe zai kasance fiye da haka".

"Ban yi kuskure ba idan na ce kashi 25% na birnin ya bace. Gine-gine da yawa sun rushe."

Wani dan jaridan kamfanin dillancin labarai na Reuters a kan hanyar zuwa Derna ya ga motoci da dama sun kife a gefen tituna, bishiyoyi sun rushe da gidaje marasa adadi. Ayarin motocin agaji da taimako gaggawa sun nufi birnin.

Jami’ai a gwamnatin yankin gabashin kasar a Litinin din nan sun bayyana cewa akalla mutane 2,000 ne ambaliyar ruwa ta kashe, ko da yake ba su fayyace dalilin wannan kiyasin ba.

Jami’ai sun ce wasu dubbai sun bace daga ambaliya, wadda suka ce ta lakume unguwanni da dama a dalilin fashewar madatsun ruwa na birnin.

Bidiyon da aka raba akan Facebook, wanda kamfanin dillancin labarai na Reuters ba zai iya tantance kansa ba, ya bayyana yana nuna gawarwakin da Ambaliyar ruwan ta laƙume lullube da barguna a kan titunan Derna.

Libya dai ta rabu a siyasance tsakanin gabas da yamma kuma ayyukan gwamnati sun durkushe tun bayan boren da kungiyar tsaro ta NATO ta marawa baya a shekara ta 2011 wanda ya haifar da rikici na tsawon shekaru.

Bayan da ya yi kaca-kaca da kasar Girka a makon da ya gabata, guguwar Daniel ta mamaye tekun Bahar Rum a ranar Lahadin da ta gabata, inda ta fantsama tituna tare da lalata gine-gine a Derna, tare da afkawa wasu matsugunan da ke gabar teku, ciki har da birnin Benghazi na biyu mafi girma a Libya.

Gwamnatin da kasashen duniya suka amince da ita a birnin Tripoli ba ta iko da yankunan gabashin kasar amma ta aike da kayan agaji zuwa Derna, inda akalla jirgin agaji daya ya tashi daga yammacin birnin Misrata a ranar Talata, in ji wani dan jarida na kamfanin dillancin labarai na Reuters a cikin jirgin.

Shugaban gwamnatin hadin kan kasa ta Libiya Abdulhamid al-Dbeibah ya bayyana cewa jirgin na ba da agajin gaggawa na dauke da tan 14 na kayayyaki, magunguna, kayan aiki, jakunkuna da ma'aikatan lafiya 87 da ma'aikatan jinya 87, wanda ya nufi Benghazi.

Shugaban gwamnatin Jamus Olaf Scholz ya wallafa a shafin X cewa, "Labarin da aka samu game da mummunar ambaliyar ruwa a Libiya yana da ban tsoro.

Kasar, Qatar, Iran da Italiya na daga cikin kasashen da suka ce a shirye suke su aika da agaji. Amurka ta kuma ce tana hada kai da takwarorinta na Majalisar Dinkin Duniya da hukumomin Libya kan yadda za su taimaka a ayyukan agaji.

Tsohuwar wakiliyar Majalisar Dinkin Duniya a Libya, Stephanie Williams, ta bukaci agajin kasashen waje cikin gaggawa, tana mai cewa bala'in "yana bukatar hanzarta kai agajin kasa da kasa da na shiyya-shiyya" a cikin sakon da ta wallafa a shafin X.