Zaharaddeen Ishaq Abubakar, Katsina Times 

A Ranar Litanin 26 ga watan Agusta, Gwamnatin Jihar Katsina ta karɓi cikakken rahoto kan binciken da aka gudanar game da ayyukan ma’aikatan hukumar Hisbah, bayan yawan koke-koke da bidiyoyin da suka bazu a kafafen sada zumunta waɗanda suka nuna damuwa ga zukatan al'umma. An gabatar da rahoton ga gwamnati daga kwamitin da aka ɗora alhakin binciken, wanda Kwamishinan Wasanni da cigaban Matasa, Dr. Aliyu Lawal Shargalle, ya jagoranta.

A yayin gabatar da rahoton, Dr. Shargalle ya bayyana cikakken aikin da kwamitin ya gudanar, wanda ya haɗa da ziyarar jihar Kano don nazartar yadda hukumar Hisbah ke gudanar da ayyukanta a can, tattaunawa da hukumomin tsaro, da kuma jin ra’ayoyin waɗanda suka kai rahoton aikata ba daidai ba da ma’aikatan Hisbah suka yi musu. Binciken ya kasance mai zurfi, inda ya shafi dukkanin abubuwan da aka ɗora wa kwamitin, kuma ya haifar da ganowa da kuma shawarwari da aka ba gwamnati domin shawo kan matsalolin da aka gano.

"Da sunan kwamitin, muna so mu mika wannan rahoton ga gwamnatin jiha. Mun gudanar da cikakken bincike kuma mun yi imani da cewa, insha Allahu, gwamnati za ta samar da mafita ga yawancin matsalolin," in ji Dr. Shargalle.

Bayan miƙa rahoton, Sakataran Gwamnatin Jihar Katsina, Barista Abdullahi Garba Faskari, ya bayyana aniyar gwamnatin na magance abin da rahoton ya ƙunsa. Ya jaddada cewa, gwamnatin da ke ƙarƙashin jagorancin Mai Girma Gwamna Dr. Dikko Umar Radda, na ƙoƙarin tabbatar da cewa, hukumar Hisbah tana cika aikinta na rage barna a cikin al’umma da inganta rayuwar mutanen Jihar Katsina.

"Ina so in tabbatar muku cewa gwamnati za ta duba duka shawarwarin da rahoton ya ƙunsa sosai kuma za ta yi ƙoƙarin aiwatar da su domin amfanin hukumar Hisbah, gwamnati da kuma al’ummar Jihar Katsina," in ji Barista Faskari.

Gwamnati ta yaba da ƙoƙarin kwamitin, tare da tabbatar da cewa za a samar da dukkanin goyon bayan da ya dace domin inganta ayyukan hukumar Hisbah, domin tabbatar da cewa tana aiki yadda aka tsara tun farko.

Miƙa rahoton ya zama wani muhimmin mataki na magance koke-koken da al’umma suka gabatar tare da dawo da kwarin gwiwa a cikin ayyukan hukumar Hisbah a Jihar Katsina.

A ranar Talata 23 ga watan da ya gabata na Yuni 2024 ne gwamnatin jihar Katsina ta kafa kwamitin mutum goma daga ɓangarorin masu ruwa da tsaki, wakilan kungiyar fararen hula, da bangarorin tsaro don bincike akan wani faifan bidiyo da ya fito daga hukumar ta Hisbah ya kuma karade kafafen sada zumunta da yake nuna yanda hukumar ke gudanar da aikin ta, inda ya jawo cece-kuce da wasu ke ganin hukumar tana wuce gona da iri a cikin gudanar da aikin ta.