Ga ta nan, ga ta nanku.
Wata rana a kusa da garin da Gizo ke sarauta, wani tsoho yana cikin gonarsa yana kashe kwarkwata. Sai ya hangi wata katuwar kwarkwata, yana shirin murtsuke ta, sai kwarkwatar ta ce da shi:
"Kada ka kashe ni, zan yi maka tsaro a gonarka."
Sai tsoho ya tambaye ta:
"Idan na bar ki, me za ki yi mini?"
Sai kwarkwatar ta ce:
"Kai dai ka sakeni a cikin gonarka, ka gani."
Mamaki ya kama tsoho, amma sai ya yanke shawarar sake ta. Bayan ya sake ta, sai ya yi kamar ya tafi gida, amma ya sami wuri ya buya don ganin abin da zai faru.
Bayan ɗan lokaci, wasu fadawan Sarki Gizo sun zo gonar don su sato harawar wake. Da suka zo za su yanka, sai kwarkwatar ta fara waka tana cewa:
"Caca bille, caca bille,
Burabusko bille,
Fadawan Sarki Gizo,
Sun zo satar harawar wake,
Su kai wa dokin Sarki."
Da fadawan suka ji waka, sai suka fara rawa ba su iya ci gaba da satar wake ba.
Da Sarki Gizo ya lura cewa fadawansa ba su dawo da harawar ba, sai ya tura dogarawansa, wato Kiyashi da Fara, domin su kamo fadawan da ya aiko. Da dogarawan suka isa, sai suka ce da fadawan:
"Yaya? Sarki ya tura ku don ku yanko harawar wake, amma kuna nan zaune? To, an ce mu kama ku!"
Sai fadawan suka ce da dogaran:
"Ku fara yankan wake, sai ku gani."
Da dogaran suka taba wake, sai kwarkwatar ta sake waka:
"Caca bille, caca bille,
Burabusko bille,
Fadawa sun zo,
Dogarawa sun zo,
Satar harawar wake,
Su kai wa dawakin Sarki."
Nan take dogarawa suka kama rawa kamar yadda fadawan suka yi.
Da aka dade ba labari daga dogarawa da fadawa, sai Sarki Gizo ya aika manyan baradensa irin su Kudan Zuma, Kunama, Cizon Maciji, da Rina domin su kamo waɗanda ya aiko. Da baraden suka isa gonar, sai suka daka tsawa suna cewa:
"Sarki ya aiko ku yanko harawar dawakan fada, amma ba ku koma ba! Kun raina Sarki ne?"
Fadawa da dogarawa suka ce:
"Ku taba wake, sai ku gani."
Da baraden suka taba wake, sai kwarkwatar ta sake waka:
"Caca bille, caca bille,
Burabusko bille,
Fadawa sun zo,
Dogarawa sun zo,
Sojoji sun zo,
Garin satar harawar wake,
Su kai wa dawakin Sarki."
Nan take su ma baraden suka kama rawa.
Da Sarki Gizo ya ga babu wanda ya dawo, sai ya tafi gonar da kansa a fusace. Yana zuwa, sai ya tarar da fadawa, dogarawa, da baradensa suna ta rawar da ba su iya tsayawa. Sai ya yi tsawa yana tambayarsu me ke faruwa.
Sai wasu daga cikinsu suka ce:
"Ranka ya dade, taba waken nan, ka gani."
Sarki Gizo ya fusata, ya ce:
"Zan sa a fille muku kawuna!"
Dukkansu suka ce:
"Don girman ikon da ke hannunka, ka taba waken, ka gani."
Da Sarki Gizo ya taba wake, sai kwarkwata ta rera wakarta:
"Caca bille,
Caca bille,
Burabusko bille,
Sarki ya zo,
Ya taba wake,
Ya kama rawa!"
Nan take Sarki Gizo ya kama rawa kamar sauran duka!
Karshen Tatsuniya.
