An gudanar da jana’izar marigayiya Hajiya Safara’u, mahaifiyar Gwamnan Jihar Katsina, Malam Dikko Umar Radda, a ranar Lahadi, 23 ga watan Ramadan 1446AH, wanda ya yi daidai da 23 ga Maris, 2025. An gudanar da jana’izar ne a garin Radda, da ke cikin Karamar Hukumar Charanci, Jihar Katsina, inda dimbin jama’a suka hallara domin karrama marigayiyar.
A yayin jana’izar, Mataimakin Gwamnan Jihar Katsina, Malam Faruq Lawal Jobe, tare da manyan sarakunan jihar, Mai Martaba Sarkin Katsina, Alhaji Dr. Abdulmumin Kabir Usman, da Mai Martaba Sarkin Daura, Alhaji Faruq Umar, ne suka jagoranci sallar gawa da sauran addu’o’i domin neman rahama ga marigayiya.
Gwamnan Jihar Katsina, Malam Dikko Umar Radda, bai samu damar halartar jana’izar ba saboda yana kasa mai tsarki inda yake gudanar da ibadar Umrah. Duk da haka, ya aike da sakon godiya da jinjina ga dukkan masu jajantawa da yin addu’a ga mahaifiyarsa.
Jama’a daga sassa daban-daban na jihar da ma kasa baki daya sun halarci wannan jana’iza, ciki har da ‘yan siyasa, gwamnoni, malamai, da shugabanni daga bangarori daban-daban na al’umma. Mutane da dama sun bayyana marigayiyar a matsayin mace mai halaye nagari da ta sadaukar da rayuwarta wajen tarbiyyar ‘ya’yanta da bayar da gudunmawa ga al’umma.
Ana ci gaba da gudanar da addu’o’i domin neman rahamar Allah ga marigayiya Hajiya Safara’u, tare da fatan Allah ya gafarta mata, ya sa Aljanna Firdausi ta zamo makoma gare ta.
