Fadar Shugaban Ƙasa
Shugaban Ƙasa Bola Ahmed Tinubu ya bayyana alhini matuƙa kan rasuwar tsohon shugaban ƙasa, Muhammadu Buhari, wanda ya riga mu gidan gaskiya a birnin London da misalin ƙarfe 4:30 na yamma, ranar Juma’a, 13 ga Yuni, 2025, bayan doguwar jinya.
Shugaba Tinubu ya ce ya yi magana da matar marigayin, Hajiya Aisha Buhari, inda ya miƙa mata da ’yan uwa da al’ummar Najeriya baki ɗaya ta’aziyya da jimamin wannan babban rashi.
A matsayin girmamawa ga marigayin, Shugaba Tinubu ya umarci Mataimakin Shugaban Ƙasa, Kashim Shettima, da ya tafi ƙasar Birtaniya domin dawo da gawar tsohon shugaban ƙasa Muhammadu Buhari zuwa gida Najeriya.
Har ila yau, shugaban ƙasa ya bayar da umarnin a sauke tutocin ƙasa rabin sanda a duk faɗin ƙasar a matsayin alamar alhini da girmamawa ga marigayin.
Tsohon shugaban ƙasa Muhammadu Buhari ya shugabanci Najeriya a matsayin zababben shugaban ƙasa daga shekarar 2015 zuwa 2023, sannan kuma ya rike matsayin shugaban mulkin soja daga watan Janairu na 1984 zuwa watan Agusta na 1985.
Ana sa ran gwamnatin tarayya za ta fitar da ƙarin bayani dangane da shirye-shiryen jana’izarsa nan ba da jimawa ba.
