A yayin wata ziyarar ta’aziyya da ya kai ga al’ummar da abin ya shafa, Gwamna Radda ya bayyana rashin jin dadinsa kan harin, tare da umartar shugaban karamar hukumar Dutsinma da ya zabo wakilai guda biyar daga cikin al’ummar domin gudanar da gaggawar taron tsaro da nufin inganta kariya daga matsalolin tsaro a matakin tushe.

Sai dai gwamnan ya bayyana cewa an tura jami’an tsaro zuwa kauyen tun kafin harin, bisa bayanan leken asiri da aka samu, amma ’yan bindigar sun kai hari ne bayan dakarun sun janye. “Mun dauki matakin gaggawa bisa rahoton tsaro, amma miyagun sun yi amfani da gibin da aka samu,” in ji Radda. Ya kuma bukaci jama’a da su kasance masu lura tare da sanar da hukumomi idan sun gano masu ba wa ’yan bindiga bayanai. “Hadin kan jama’a ne mafita ga wannan matsala,” ya jaddada.

Gwamnan na tare da wakilin mazabar Dutsinma a majalisar dokokin jihar, Hon. Mohammad Abubakar Khamis, da Hakimin Dutsinma, Alhaji Sada Mohamed Sada, yayin ziyarar. Ya kuma tabbatar wa da al’umma cewa gwamnatinsa za ta ci gaba da aiki tukuru domin dawo da zaman lafiya a yankin.

A wani bangare daban, Gwamna Radda ya kai ziyarar duba yadda ake ci gaba da aikin gina Makarantar Smart da ke Radda, karamar hukumar Charanchi. Makarantar na daga cikin guda uku da ake ginawa a kowace mazabar sanata da nufin kara damar samun ilimi mai inganci ga yaran talakawa a yankunan karkara.

Gwamnan ya nuna rashin gamsuwa da yadda aikin ke tafiya, inda ya gargadi kwangiloli da su hanzarta kammala aikin ba tare da rage inganci ba. “Wannan aiki wata muhimmiyar manufa ce da gwamnatina ta dauka don sauya tsarin ilimi a jihar Katsina,” in ji Radda.

Duk da alkawuran da gwamnan ya sake yi, al’umma na cigaba da bayyana bukatar ganin matakan da za su kawo karshen kashe-kashe da hare-hare. Yayin da ’yan bindiga ke cigaba da cin karo da jami’an tsaro, idanu na kan gwamnati domin ganin ta dauki matakin da ya dace wajen kare rayuka da dukiyoyin jama’a.