TATSUNIYA: Labarin Kura Da Gizo
- Katsina City News
- 04 Jan, 2025
- 74
Akwai wani lokaci da Kura da Gizo suka zama abokai. Duk da cewa Gizo ba ya amince da kowa, ya yarda da Kurar saboda ya ga tana da girma da karfi, kuma zai iya samun riba daga dangantakarsu.
Wata rana, Gizo ya gayyaci Kura su je gona domin su samo abinci. A can gonar, sun tarar da ayaba masu kyau suna ta rataye a bishiya mai tsawo. Gizo ya dubi bishiyar ya ce:
“Ke, Kura, girman nan naki zai taimaka mu samu ayaba. Ki tsaya ni in hau bayanki, daga nan kuma sai in hau kan bishiyar.”
Kura ta amince, ta tsaya yayin da Gizo ya hau bayanta. Da zarar ya hau bishiyar, sai ya fara cin ayaba shi kadai, ba tare da ya kawo wa Kura komai ba. Kura ta yi hakuri tana jiran Gizo ya dawo da abinci, amma har rana ta fadi, Gizo bai kawo mata komai ba.
Da Gizo ya gama cin ayabar, sai ya sauko da dariya yana cewa:
“Ke dai Kura, kina da girman jiki amma ba ki da hankali! Ai ni Gizo mai wayo, ba zan taɓa wahala ba.”
Kura ta fusata sosai amma ta yi shiru. Ta kalli Gizo, ta ce:
“Ba komai, Gizo. Ka gama abinka, amma mu gani gobe.”
Washegari, Kura ta gayyaci Gizo su tafi tafkin ruwa domin su samo kifi. A can tafkin, Kura ta fara shiga ruwa tana farautar kifi. Ta kamo kifaye masu yawa sannan ta fito bakin ruwa tana jibge su a gefe.
Gizo ya yi farin ciki sosai, yana zuba ido Kura ta ba shi kifi. Amma Kura sai ta ce:
“Ka duba can tafkin, akwai wasu kifaye masu kyau. Ka shiga ka kama naka, domin nawa wadannan.”
Gizo ya shiga tafkin, amma saboda ƙanƙantarsa, ya kasa kamo kifi. Sannan ya fara nutsewa saboda ruwa ya yi zurfi. A cikin matsanancin hali, sai ya fara rokon Kura:
“Don Allah, Kura! Ki ceci rayuwata, ba zan sake cutar da ke ba.”
Kura ta yi dariya, ta ce:
“Ai ka koya wa kanka darasi. Wayo ba ya hana mutum biyan bukatarsa.”
Daga nan, Kura ta taimaki Gizo, amma ta jaddada masa cewa kada ya sake cutar da ita.
Darasi:
A rayuwa, kar ka yi amfani da wayo wajen cutar da wasu. Duk abin da ka shuka, shi za ka girba.
Search
Category
Tags
Social Media
