Gwamnatin Tarayya Ta Nemi Zuba Jari Na $100bn, Da Samar Da Ayyuka Miliyan 2 Daga Tattalin Arzikin Kirkira
- Katsina City News
- 22 Aug, 2024
- 190
Gwamnatin Tarayyar Najeriya, ta hannun Ministar Kere-kere, Al’adu da Tattalin Arzikin Kirkira, Hannatu Musa Musawa, ta bayyana shirin neman zuba jari na dala biliyan $100 da samar da ayyuka miliyan biyu daga sashin kere-kere da al’adu a matsayin wani bangare na kokarin farfado da tattalin arzikin Najeriya.
A wata hira da aka yi da ita, Minista Musawa ta jaddada cewa wannan gwamnati ta dukufa wajen daukar kaso mai tsoka na kasuwar duniya, musamman daga fiye da dala tiriliyan $1 na bangaren kere-kere, wanda ya yi daidai da sabon fata da wannan gwamnati ke yi.
Musawa ta bayyana cewa akwai damarmaki da yawa a cikin tattalin arzikin kere-kere da al'adu na Najeriya, inda ta nuna cewa daidaitattun tsare-tsare na iya ba da damar kasuwanci mai kyau da bude dama a cikin tsarin masana'antu
Ta bayyana hadin gwiwar gwamnati da kamfanoni masu zaman kansu, ciki har da haɗin gwiwa da Kungiyar Taron Tattalin Arzikin Najeriya (NESG), don hanzarta samun kudaden jari daga masu ruwa da tsaki a cikin tsarin kere-kere.
Ministar ta kuma sanar da hadin gwiwa da BigWin Philanthropy, wata babbar kungiyar ci gaban kasa da kasa, domin gabatar da tsare-tsaren samar da ayyuka da dabarun masana'antu.
Musawa ta nuna cewa shigar da ma'aikatar cikin haɗin gwiwa da BigWin ya samo asali ne daga ingantaccen tsarin da suka yi amfani da shi wajen samar da ayyuka ga matasa dubu 500,000 na Ruwanda masu fasahar dijital da kafa ayyukan dorewa a Côte d'Ivoire. Ma'aikatar na shirin yin kwatankwacin wannan nasara a Najeriya.
Ministar ta fitar da wata dabara a kan amfani da tsare-tsaren doka, zuba jari mai tsari, haɗin gwiwa da kuma rangwamen haraji don kara yawan ayyuka a cikin wannan bangare. Ta kuma nuna cewa ana ci gaba da yin amfani da damar da Najeriya ta ke da shi a ƙarƙashin Yarjejeniyar Kasuwancin Afirka (AfCFTA) da faɗaɗa tattalin arzikin gabaɗaya don sanya fitar da kayan kere-kere na Najeriya ya zama mai karfi a cikin kasuwar Afirka ta dala biliyan $3.4.
Bugu da kari, ministar ta tabbatar da ci gaba da haɗin gwiwa da manyan masu ruwa da tsaki a cikin tattalin arzikin kere-kere, ciki har da masu kasuwanci da bangaren fasaha.
Musawa ta jaddada cewa farfado da gidan wasan National Theatre da yankunan da ke kewaye zai kara wa tsarin kere-kere karfi ta hanyar samar da wuraren kirkire-kirkire, cibiyoyin kere-kere da wuraren shakatawa. Ta bayyana cewa wannan kokari ya riga ya jawo hankalin 'yan masana'antu masu kirkira da ke binciken damammaki na tattalin arziki a gidajen wasanni National Theatre.
Search
Category
Tags
Social Media
