A cigaba da ziyarce-ziyarce da matashin dan siyasa kuma daya daga cikin jagoran matasa, Honarabul Musa Yusuf Gafai ya kai ziyarar ga jiga-jigan jam'iyyar APC na mazabarsa ta Wakilin Yamma II da ke cikin garin Katsina.
Honarabul Musa Yusuf Gafai ya kai makamanciyar wannan ziyarar ga tsohon mai taimakawa Tsohon Gwamnan Alhaji Aminu Bello Masari, Honarabul Tanimu Sada Sa'ad, wanda shi ma jigo ne a mazabar Wakilin Yamma II, inda suka tattauna muhimman batutuwa da suka shafi jam'iyyar APC da kuma gwamna Malam Dikko Umar Radda. Alhaji Tanimu Sada ya bayyana jin dadinsa bisa ga hukuncin da Honarabul Musa Gafai ya dauka na dawo wa jam'iyyar APC.
Hakazailka Honarabul Musa Yusuf Gafai ya kai ziyarar ga shugaban masu ruwa da tsaki na mazabarsa, Alhaji Abdullahi Esha, wanda shi ne shugaban kungiyar yan kwangila ta jihar Katsina, inda suka tattauna da lalubo hanyoyin da kowa zai ba da gudummuwarsa don ganin gwamna Malam Dikko Umar Radda ya kara samu goyan baya da kuma cigaban jam'iyyar APC a jihar Katsina da ma kasa baki daya.
Matashin dan siyasar, Honarabul Musa Yusuf Gafai ya kai ziyarar sada zumunci da bayyana matakin da ya dauka na dawo wa jam'iyyar APC ga tsohon dan majalisar dokokin jihar Katsina kuma Tsohon shugaban hukumar ba da agajin gaggawa ta jihar Katsina, Honarabul Babangida Nasamu, inda suka kwashe tsawon lokaci suna tattauna yadda za'a samu cigaban tafiyar gwamna Malam Dikko Umar Radda da kuma jam'iyyar APC da kuma hanyoyin ganin jam'iyyar APC ta samu nasarar lashe zaɓen kananan hukumomin da za'a gudanar a wata mai kamawa da kuma sauran batutuwa.
