NUJ ta tantance tare da rajistar ‘yan jaridar yanar gizo a Katsina

Kwamishina, da sauran mahalarta sun bukaci ƙarin ƙwarewa da bin ƙa’idojin aikin jarida

Daga Zaharaddeen Ishaq Abubakar | Katsina Times

Ƙungiyar ‘Yan Jarida ta Najeriya (NUJ), reshen Jihar Katsina, ta fara shirin tantancewa da rajistar sahihan ‘yan jaridar yanar gizo (intanet) da ke gudanar da ayyukansu a jihar.

Ƙungiyar ta ce matakin na da nufin inganta ƙwarewa, da’a, riƙon amana da kuma amfani da kafafen sadarwar zamani yadda ya kamata, musamman ganin yadda kafafen yaɗa labarai na intanet ke ƙara samun karɓuwa.

Shugaban NUJ na Jihar Katsina, Kwamared Aminu Garba Dandagoro, ne ya bayyana hakan a ranar Asabar yayin taron masu ruwa da tsaki na yini ɗaya da aka gudanar a Katsina.

Taron, wanda aka gudanar a Hayat Regency Suites da ke Katsina, ya samu halartar ‘yan jarida, malamai, jami’an gwamnati, da sauran masu ruwa da tsaki.

An gudanar da taron ne ƙarƙashin taken: “Aikin Jarida, Dimokuraɗiyya da Sabunta Hukumomi: Samar da Sabuwar Hanya ga NUJ ta Jihar Katsina.”

Dandagoro ya ce NUJ ta fahimci muhimmiyar rawar da kafafen yaɗa labarai na intanet ke takawa wajen wayar da kan jama’a da yaɗa labarai.

Sai dai ya ce yadda kafafen intanet ke yaɗuwa cikin sauri ya sa ya zama wajibi a ƙara mayar da hankali kan ƙwarewa, da’a da kuma ɗaukar alhakin abin da ake wallafawa.

Ya ce shirin rajistar ba wai an yi shi ne domin hana wasu gudanar da aikin jarida ba, sai dai domin samar da tsari da zai ba sahihan ‘yan jaridar intanet damar samun karɓuwa a matsayin masu aikin jarida, tare da tabbatar da cewa suna bin ƙa’idojin sana’ar.

“Wannan shiri ba domin ware kowa ba ne. Manufarsa ita ce samar da tsari da ‘yan jaridar intanet za su samu karɓuwa a matsayin masu aikin jarida, tare da ƙarfafa musu gwiwar bin ƙa’idoji da nauyin da ke kan ‘yan jarida,” in ji shi.

Ya buƙaci ‘yan jaridar intanet da ke jihar da su ba NUJ haɗin kai wajen gudanar da rajistar, tare da samar da bayanai da takardun da ake buƙata.

Ya ce hakan zai taimaka wajen samar da ingantacciyar al’ummar kafafen yaɗa labarai da za ta kasance mai haɗin kai da ɗaukar alhakin ayyukanta a Katsina.

Da yake wakiltar Gwamna Dikko Umar Radda a wajen taron, Kwamishinan Yaɗa Labarai da Al’adu na jihar, Dakta Bala Salisu Zango, ya yaba wa NUJ bisa shirya taron, tare da tabbatar wa ‘yan jarida cewa gwamnatin jihar za ta ci gaba da ba su haɗin kai.

Zango ya ce Gwamna Radda ba zai samu damar halartar taron da kansa ba saboda yana halartar wani muhimmin taro, amma ya bayyana muhimmancin da yake bai wa wannan taron.

Ya taya sabbin shugabannin NUJ murna, tare da yaba musu bisa samar da wannan dama da ta haɗa masu ruwa da tsaki domin tattauna makomar aikin jarida.

Kwamishinan ya ce gwamnatin jihar na kallon kafafen yaɗa labarai a matsayin muhimman abokan hulɗa wajen gudanar da mulki, musamman wajen sanar da jama’a manufofi da shirye-shiryen gwamnati.

Ya ce ‘yan jarida na taka muhimmiyar rawa wajen isar da koke-koken jama’a da kuma burinsu ga gwamnati.

“Muna sane da irin ƙoƙari da gudunmawar da kuke bayarwa wajen ganin jama’a sun samu cikakken bayani da wayewa kan ayyukan gwamnati a jihar, tare da isar wa gwamnati da manufofi da muradun jama’a,” in ji Zango.

Ya tabbatar wa ‘yan jarida cewa gwamnatin Radda za ta ci gaba da kyakkyawar alaƙar aiki da kafafen yaɗa labarai.

Gwamnati ta kashe sama da Naira biliyan 1.2 wajen inganta KTTV

Zango ya bayyana cewa gwamnatin Katsina ta kashe sama da Naira biliyan 1.2 wajen sabunta da inganta tashar talabijin ta jihar, KTTV.

Ya ce an zuba jarin ne a wani ɓangare na ƙoƙarin gwamnatin wajen ƙarfafa kafafen yaɗa labarai mallakin jihar da kuma inganta yadda ake isar da labarai ga jama’a.

A cewarsa, gwamnati ta kuma zuba jari wajen samar da sabbin kayan aiki da na’urorin amfani da hasken rana domin ba kafafen yaɗa labarai damar gudanar da ayyukansu yadda ya kamata.

Ya ƙara da cewa gwamnati na kafa wasu ƙarin tashoshin yaɗa shirye-shiryen rediyo da talabijin, inda ya ce an riga an bayar da kwangilar ɗaya daga cikin ayyukan.

Kwamishinan ya ce manufar waɗannan ayyuka ita ce tabbatar da cewa al’ummar Katsina na samun sahihin labarai cikin lokaci.

Ya bayyana cewa labarai na da matuƙar muhimmanci wajen gudanar da mulki da ci gaban al’umma, yana mai cewa aikin kafafen yaɗa labarai ya haɗa da ilmantarwa, wayar da kai da kuma nishaɗantar da jama’a.

Kwamishinan ya kuma goyi bayan shawarar gudanar da gwaje-gwajen lafiya akai-akai ga ‘yan jarida.

Ya ce yanayin aikin jarida, musamman yawan aiki da damuwa da ‘yan jarida ke fuskanta, na buƙatar a rika kula da lafiyarsu.

Ya ce ya kamata ‘yan jarida su rika yin gwaje-gwajen lafiya akai-akai, ciki har da duba hawan jini, domin gano matsalolin lafiya tun da wuri.

Zango ya yi wannan tsokaci ne bayan an gabatar da shawarar a wajen taron cewa ya kamata a samar da tsarin duba lafiyar ‘yan jarida akai-akai.

Da yake magana kan yadda za a tsara aikin kafafen yaɗa labarai na intanet, Zango ya yi nuni da sashe na 39 na Kundin Tsarin Mulkin Najeriya na 1999, wanda aka yi wa gyara.

Advertisement

Ya ce kundin tsarin mulkin ya bai wa kowane ɗan ƙasa ‘yancin faɗin albarkacin baki da kuma yaɗa labari, ra’ayoyi da tunani.

Sai dai ya jaddada cewa wannan ‘yanci bai kamata a ɗauke shi a matsayin damar yin aikin jarida ba tare da bin ƙa’idojin ba.

Ya buƙaci a ƙara mayar da hankali kan da’a, sahihancin labari, tantance gaskiyar labari da kuma ɗaukar alhakin abin da ake wallafawa.

Zango ya kuma bayyana cewa gwamnati na shirin gudanar da tantance masu kafafen yaɗa labarai na intanet da masu amfani da kafafen sada zumunta da ke gudanar da irin wannan aiki a Katsina.

Ya ce matakin ya zama dole saboda akwai wasu mutane da ke gudanar da kafafen yaɗa labarai ba tare da cikakken sani kan dokokin aikin jarida da ƙa’idojin sana’ar ba.

Ya jaddada muhimmancin ci gaba da horas da ‘yan jarida da masu kafafen intanet, yana mai cewa ƙarin ilimi da horaswa na da muhimmanci wajen inganta aikin jarida.

Kwamishinan ya ba da misalan wasu lokutan da ‘yan jarida suka wallafa labarai da suka samu yayin tattaunawa ba tare da fayyace ko bayanan na cikin sirri ne ko kuma an amince a wallafa su ba.

Ya ce ya kamata ‘yan jarida su fahimci ƙa’idojin ambaton majiyar bayani, neman izini, tantance gaskiyar labarai da kuma amfani da bayanan da suka samu daga jami’an gwamnati cikin sanin ya kamata.

Ya kuma yi kira ga jami’an gwamnati da su inganta hanyar da ‘yan jarida ke samun bayanai, tare da samar da kyakkyawar alaƙar aiki tsakanin gwamnati da kafafen yaɗa labarai.

A nasa jawabin, Farfesa Mukhtar El-Kasim na Jami’ar Ahmadu Bello da ke Zariya, ya bayyana halin da aikin jarida ke ciki a Najeriya a matsayin abin damuwa, yana mai kira da a gaggauta yin gyare-gyare.

Ya ce kafafen yaɗa labarai na da matuƙar muhimmanci ga dimokuraɗiyya da ci gaban ƙasa, amma har yanzu ba a ba aikin jarida cikakken matsayin da ya dace da muhimmancinsa ba.

El-Kasim ya ce ‘yan jarida na taka muhimmiyar rawa wajen tafiyar da dimokuraɗiyya, musamman wajen isar da manufofin shugabanni ga jama’a.

Sai dai ya ce kafin ‘yan jarida su nemi ƙarin matsayi da karɓuwa daga gwamnati da al’umma, ya kamata su fara magance wasu matsalolin cikin gida, musamman rashin haɗin kai tsakanin masu aikin jarida da ƙungiyoyinsu.

Ya kuma yi kira da a ƙara bai wa aikin jarida cikakken matsayi na sana’a kamar yadda ake yi wa sauran sana’o’i irin su likitanci, shari’a da koyarwa.

Ya buƙaci ‘yan jarida su ƙara inganta ƙwarewarsu tare da haɗa kai wajen neman gyare-gyaren da za su ƙarfafa sana’ar.

Shugaban taron, Farfesa Sani Abubakar Lugga, Wazirin Ilimin Ƙasar Hausa, ya ce aikin jarida na ɗaya daga cikin ginshiƙan dimokuraɗiyya, amma a yanzu yana fuskantar matsaloli irin waɗanda sauran hukumomi ke fuskanta a Najeriya.

Lugga ya ce yawaitar kafafen sada zumunta ya sa ake samun wahalar bambance ƙwararren ɗan jarida da mutumin da ke amfani da intanet kawai wajen yaɗa labarai 

“Abin takaici ne yadda a yau aikin jarida ke cikin irin wannan ruɗani tare da bangaren zartarwa, majalisa da shari’a. A Najeriya a yau, yana da wahala a bambance gaskiya da ƙarya,” in ji shi.

Ya buƙaci NUJ ta samar da ingantaccen tsarin tantance ‘yan jarida na gaskiya da kuma kare sana’ar daga masu kutse.

Ya kuma yi kira da a tsaurara bin ƙa’idojin aikin jarida da da’arsa, domin tabbatar da cewa sahihan bayanai da aka tantance ne kawai ake yaɗawa ga jama’a.

NUJ ta buƙaci ƙarfafa hukumomi da haɗin kan ‘yan jarida

A jawabinsa na maraba, Shugaban NUJ na Jihar Katsina, Kwamared Aminu Garba Dandagoro, ya ce an shirya taron ne domin bai wa ‘yan jarida da sauran masu ruwa da tsaki damar nazarin matsalolin da ke addabar sana’ar tare da samar da sabuwar hanyar da za ta jagoranci NUJ a jihar.

Ya ce aikin kafafen yaɗa labarai bai tsaya ga kawo labarai kawai ba, domin ‘yan jarida na da nauyin wayar da kan jama’a, inganta zaman lafiya, neman gwamnati ta ɗauki alhakin ayyukanta, kare muradun jama’a da samar da wurin tattaunawa mai ma’ana.

A cewarsa, ƙarfin NUJ na da alaƙa kai tsaye da ingancin aikin jarida da kuma ci gaban al’umma.

Dandagoro ya yaba wa Gwamna Radda bisa goyon baya da haɗin kan da gwamnatinsa ke bai wa kafafen yaɗa labarai.

Ya kuma yaba wa ma’aikatun gwamnati, hukumomi, jami’an tsaro, ƙungiyoyin farar hula da sauran masu ruwa da tsaki bisa gudunmawar da suke bayarwa wajen bunƙasa aikin jarida a jihar.

A nasa jawabin, Alhaji Usman Bello Ƙanƙara, Kanwan Katsina kuma Hakimin Ƙetare, ya taya sabbin shugabannin NUJ murna tare da buƙatarsu da su gina kan nasarorin da shugabannin da suka gabata suka samu.

Ya yaba wa tsohon shugabancin NUJ karkashin Comrade Tukur Hassan Ɗan Ali, bisa gudunmawar da ya bayar wajen ci gaban aikin jarida a jihar.

Bello ya kuma yaba wa malaman da suka gabatar da jawabai a wajen taron, inda ya buƙaci ‘yan jarida su yi amfani da damar horaswa da ƙarin ilimi wajen inganta ƙwarewarsu.

An kammala taron da kira ga ‘yan jarida da su ƙara haɗa kai, inganta jin daɗin ma’aikata, bin ƙa’idojin aikin jarida, ci gaba da samun horaswa da kuma ƙarfafa hukumomin ƙungiyar domin inganta aikin jarida a Katsina.

Babban Sakatare na Ma’aikatar Yaɗa Labarai ta Jihar Katsina, kuma tsohon Shugaban NUJ na jihar, Kwamared Tukur Hassan Ɗan Ali, ne ya gabatar da jawabin godiya na ƙarshe.